понедельник, 16 июня 2014 г.
среда, 11 июня 2014 г.
Ընդդիմությունն ինչքան ուզում է ՝,,գայլի գլխին ավետարան կարդա,,.12 կետից բաղկացած
Երկիրը վեր է ածվել Սոդոմ-Գոմորի: Օր չկա, որ ,,Կենտրոնը,, կամ ,,Ազատությունը,, թեժ լուրեր չներկայացնեն ՝սոցիալական թեժ ,,մարտերի,, մասին պատմող տեսանյութերով: Էլ ,,Դեմ ենք,, էլ ՝,,Չենք վճարելու 150 դրամ,, ու ,,Դուրս եկեք մեր գրպանից,, քաղաքացիական շարժումներ, էլ տարատեսակ խմբակային ու անհատական բողոքի ցույցեր: Պատկերն ամբողջանում է ,,Արմենիայի,, կիրակնօրյա ,,Սուր անկյունով,, ՝արդեն սովորական դարձած արտակարգ դեպքերի մասին պատմող ռեպորտաժներով:Հերթական սոցիալական ,,բոթը,, երեկ էր, երբ պարզվեց, որ Հանրային ծառայությունները կարգավորող հանձնաժողովը պինդուպինդ որոշել է նպաստել էլեկտրաէներգիայի գնի հերթական բարձրացմանը ՝ օգոստոսից նախատեսվող: Իբր ՝ Ռուսաստանին սեփականաշնորհած ՀԷՑ-ը վնասով է աշխատում. լոռեցիների ասած ՝,,բոյ-բոյ-բոյ. տեսա՞ր դու,,: Վնասով է աշխատո՞ւմ ՝ թող համակարգի բարձրաստիճան պաշտոնյաների աշխատավարձը կրճատի կամ ՝ անիմաստ հաստիքները : Իբր ՝20միլիարդ դրամի ,,ճեղքվածք,, կա այս ոլորտում /այսինքն ՝պակասորդ, իսկ պակասորդ ունեցող գործակատարներին սովետի թվերին դատում էին, բայց հիմա որոշել են էլցանցի ,,պակասորդը,, բնակչության ,,ջանից,, հանել,այնպես, ինչպես ՏՄՊՊՀ-ի կողմից 20միլիոն դրամի տուգանքը /: Երեկվա հաջորդ տհաճ լուրը, որ ,,գուժեցին,, մի քանի հեռուստաալիքներ, այն էր, որ Վանաձորի քիմգործարանի աշխատողների 10-11ամսվա աշխատավարձի պարտքերը դեռ չեն պատրաստվում վճարել, թեպետ ՝հունիսի 10-ին մի մասը վճարելու խոստում էր տրվել: ,,Ինձ ասում եք, որ ի՞նչ անեմ,,-Լոռու մարզպետարանի շենքի առջեւ հավաքված ցուցարարներին ի պատասխան ՝հայտնել է մարզպետը, որ խոստովանել է, թե տեղյակ էլ չէ, թե ով է գործարանի սեփականատերը եւ աշխատողներին խորհուրդ է տվել դիմել գործարանի գլխավոր տնօրենին:,,Մի 60 անգամ դիմել ենք,,-ի պատասխան նշել է քիմիագործներից մեկը: Դատելով հեռուստատեսությամբ ցուցադրված կադրերից, մարդկանց համբերությունն արդեն իսպառ հատել է սահմանը, եւ չգիտեն, թե ինպե՞ս ապրեն, ինչպե՞ս վարձեր մուծեն, վարկեր մարեն,բանակում ծառայող որդի պահեն...Ի՞նչ է ստացվում. բախտի բերմամբ թե պատահմամբ խորհրդարանում հայտնված որոշ ,,երեսփոխաններ,, որոնց հիմնական ,,աշխատանքն,, ընդամենը կոճակ սեղմելն է ՝այս կամ այն տխրահռչակ օրենքն անցկացնելու նպատակով, պետք է տեղը տեղին աշխատավարձ ստանան ամեն ամիս .այն էլ՝ շատ բարձր աշխատավարձ, իսկ թունավոր օդ կուլ տվող, ամոնիակի ու սնդիկի միաջավայրում առղջությունը վտանգող, արտադրության մեջ մազերն սպիտակած մարդիկ /որոնց թվում ՝կանայք / պետք է ամիսներով աշխատավարձ չստանան ու ամեն ամիս բողոքի ցույց կազմակերպեն, որ գոնե մի ամսվա փող ,,պոկեն,, մի կերպ:Թեպետ, աշխատակիցներից մեկը նշեց, որ արդեն իրենց համբերությունն սպառվել է եւ մեկ ամսվա խնդիր լուծելու նպատակ չեն հետապնդում:Սրանից էլ մեծ, աչք ծակող սոցիալական անարդարությու՞ն: Ավետիք Իսահակյանի ասած ՝,,Խեղճ աղքատը դառը դատի, դատարկ նստի, հե՜յ աշխարհ, էլ ինչու՞ ես քարը թողնում քարի վրա, քար աշխարհ,,: Մի՞թե կառավարությունն ի վիճակի չէ տարիներ շարունակ կարգավորել այս ոլորտը թե Վանաձորի քիմգործարանի, թե ,,Նաիրիտի,, պարագայում:Ի՞նչ է նշանակում մարդուն աշխատեցնել, ու ամիսներով աշխատավարձ չտալ, բայց պահանջել վարձեր մուծել: Այսինքն մարդն ունի միայն սոցիալական պարտավորություններ, իսկ իրավունքներ չունի:՞ Սա ամենաիսկական ստրկական պայմաններ են զարգացած կապիտալիզմի դարաշրջանում:Բոլոր հիմքերը կան ենթադրելու, որ ամեն ինչ արվում է երկիրն ,,ավելորդ ուտող բերաններից ազատելու,, եւ արտագաղթը խրախուսելու նպատակով. աշխատողներին նորմալ չեն վճարում, գործազուրկներին նպաստ չեն տալիս ՝այն կրճատելով եւ ավելորդ շքեղություն,, համարելով, իսկ աշխատաշուկայում արդեն ոչ մրցունակ համարվող կամ ոչ կուսակցականացված / այսինքն ՝ իշխանական կուսակցության անդամ չհամարվող / մարդկանց էլ գոնե ԽՍՀՄ խնայբանկի ավանդները չեն վերադարձնում, որ մի կերպ գոյատեւեն: /Այլ կերպ ՝ մարդկանց թթվածինն ամեն կերպ փակում են ու ակամա մատնացույց անում արտագաղթի ճանապարհը /: Թերեւս, հենց դրա համար էլ ավանդների վերադարձի ,,քավոր,, ՕԵԿ-ը դուրս եկավ խորհրդարանական կոալիցիայից, տեսնելով, որ իրենց ծրագրերն իրականություն չեն դառնում: Եթե անգամ 1931 թվի ծնվածները չեն ավանդների փոխհատուցում ստացել, 1950-60 թվերից հետո ծնվածներին ե՞րբ է հասնելու հերթը: Որքան էլ դաժան հնչի, ավագագույն սերնդի մարդկանց, տարեց թոշակառուների, որոնք այդպես էլ չստացան այդ ավանդներն ՝այս անցավոր ու հանցավոր աշխարհից գնալիս, մնաց 200հազար դրամ թաղման նպաստը, որպես կառավարության կողմից մեծագույն ,,գթասրտության,, արտահայտություն այն մտայնությամբ, որ տեսեք, մենք ձեր ավանդները չկարողացանք տալ, բայց թաղումներդ կկազմակերպենք: Թեպետ ՝այդ գումարն էլ վճարում են մեռնող թոշակառուների մահից 1 ամիս հետո, հարազատներին ակամա մղելով ,,իրարից պարտք անելու,, հին հայկական սովորույթին:Իսկ գներն օրեցօր աճում են ՝վարձերի բարձրացմանը զուգընթաց: Շուկայական մաֆիան հենց որ լսեց էներգիայի հերթական բարձրացման լուրը ՝հիմա էլ ռուսական ձեթի գինը բարձրացրեց ՝100-200դրամով: Դե քանի որ վաղուց ի վեր իրանական ու թուրքական ձեթ չի հայտնվում շուկայում, ուստի ռուսականն սկսել է մոնոպոլ դիրք գրավել եւ թելադրել իր ,,պայմանները,,: Փաստորեն, անցած ամսվա սկիզբը Վանաձորում նշանավորվեց հացի գնի բարձրացմամբ / ասում են ՝ մայրաքաղաքում ավելի վաղ էր բարձրացել /, այս ամսից էլ ՝ձեթի: Եթե մի բան էժանացնում են ՝ժամկետի պատճառով, մի ուրիշ բան պետք է թանկացնեն: Ամառային շոգերի պատճառով ձվի գինը փոքր-ինչ իջել է / թանկանալուց հետո /, հիմա էլ ձեթի գինն են բարձրացնում. ահա եւ մաքսային միության մեջ մտնելու ,,աչքալուսանքը,,: Իսկ ընդդիմադիր պատգամավորները շարունակում են ,,գայլի գլխին ավետարան կարդալ,, ու 12 կետից բաղկացած պահանջագիր են ներկայացրել ՝կառավարությանը մինչեւ սեպտեմբեր ,,խելոքանալու,,ժամկետ տալով:Այս ընթացքում ստվերային շուկայի խոշոր ,,գայլերը,, հերթական հարձակումն են սկսել ժողովրդի գրպանի վրա ՝դոլարի ու եվրոյի կուրսը գցելով, գներն անփոփոխ թողնելու կամ տեղ-տեղ բարձրացնելու պայմաններում:,,Դե Իսպանիայի, Դուբայի ու կուրորտների սեզոնն սկսվել է, տղեքին դոլար ու եվրո է պետք, դրա համար էլ էժան հավաքում են,,-հեգնանքով նկատում են մարդիկ:Թերեւս, այդ նույն նպատակին են ծառայում նաեւ քիմիագործների աշխատավարձերը ՝բանկերում պտտեցվելով:Իսկ ահա, ռուսական ռուբլու կուրսն սկսել է բարձրանալ, քանի որ երկրից արտագաղթողները կամ ժամանակավոր աշխատանքի մեկնողները հիմնականում Ռուսաստան են ուղեւորվում, չիմանալով անգամ, թե այնտեղ իրենց ինչ է սպասվում. թեպետ համոզված են, որ Հայաստանից ավելի վատ չի լինի, չնայած ՝ ռուսական ասացվածքն ասում է ՝,,Լավ է այնտեղ, որտեղ մենք չկանք,,: ԳԱՅԱՆԵ ՀՈՎՍԵՓՅԱՆ
вторник, 10 июня 2014 г.
Կարկատանային անորակ ասֆալտապատման ու խճապատման հետեւանքները Վանաձորում
Ընդամենը 2 ամիս առաջ, ս.Զատկի նախօրեից Վանաձորում սկսվեցին տարեկան կտրվածքով նույն փողոցներում արվող պլանային, կարկատանային ասֆալտաքանդումներն ու ասֆալտապատումները: Թե որքանով էին այդ աշխատանքները որակյալ, պարզ դարձավ մայիս-հունիսյան հորդառատ անձրեւներից հետո, երբ ավտոճանապարհներին, ինչպես սովորաբար, հսկայական լճափոսեր առաջացան ՝ավտոմեքենաների ու հետիոտների համար տհաճ հետեւանքներ առաջացնելով: Իսկ Լուսավորիչ,Ղուկասյան,Տերյան փողոցներում, որտեղ դեռ անցած տարի ջրատար խողովակներ փոխեցին ու այդ նպատակով ասֆալտը քանդեցին, կարկատանային անորակ ասֆալտապատման հետեւանքով, յուրաքանչյուր անձրեւից հետո փոսերը լցվում են անձրեւաջրերով: Կ.Դեմիրճյան 28 շենքի բակում էլ անձրեւային օրերին շարունակում է լիճ գոյանալ. առնվազն վերջին 5տարում այս տարածքը մի 10 անգամ քանդել-փորել են ՝ վթարները վերացնելու նպատակով, բայց քանի որ ասֆալտ չեն արել, ուստի, թերեւս, վթարները չեն դադարել:Անցած ամիս Լուսավորչի փողոցի մի հատվածում դեռ նախորդ տարվանից սկսված աշխատանքների շարունակությունն էր ընթանում ՝ շուկայամերձ տարածքներից մինչեւ Խորենացի, ու հիմա մայթ ու ավտոճանապարհ խառնվել են իրար ՝ հողախճաքարազանգվածով անհաջող կարկատած:Ճանապարհային ոստիկանությունն էլ այս պայմաններում հաճախ ստիպված է լինում ,,հոպ-ստոպ անել,, ակամա իրավախախտ դարձած վարորդներին, ու անվերջ ,,ռազբորկաներ,, են:Նույն կարկատանային խճապատումն էլ Խորենացու ու Նժդեհի վրա է / այսպե՞ս են հարգում հայոց մեծերին, եթե նրանց անունով անվանակոչված փողոցների նկատմամբ արհամարհական վերաբերմունք է /:Լազյանի մի հատված էլ ՝ Գոշի փողոցից սկսվող, մի քանի ամիս առաջ խճապատեցին, ու այդպես էլ թողեցին:Այս հատվածում արդեն տխուր ավանդույթ է դառնում ժամանակ առ ժամանակ խճապատելն ու չասֆալտապատելը / թերեւս, այդ հատվածում գտնվող կոշկակարանոցի աշխատանքներն աշխուժացնելու նպատակով /: Ընդ որում, այս տարածքով նաեւ ավտոմեքենաներ են անցնում, եւ , դժվար չէ ենթադրել, որ անվադողերի էլ հերն է անիծվում: Անմխիթար վիճակում է նաեւ Շիրվանզադե / Լուսավորիչ խաչմերուկից մինչեւ Մոսկովյան հատվածը .այսինքն ՝ ,,Լաչինի միջանցքի,, շարունակություն, որտեղ բացօթյա առեւտրի վայր է, բայց մեքենաներն ու անցորդները նույն տարածքով են երթեւեկում, իսկ այս փողոցի մի երթեւեկելի հատվածը դեռ նախորդ տարի, աշնանը երկարությամբ քանդեցին, ու անգամ ասֆալտ չարեցին ՝ ընդամենը հողաշերտով անհաջող ծածկելով: Փողոցի անմխիթար վիճակն էլ նպաստում է երթեւեկության համար վտանգավոր իրավիճակ ստեղծելուն, քանի որ անբարեկարգ հատվածներից խուսափելու համար հետիոտներն ստիպված ավտոճանապարհով են քայլում:Առհասարակ քաղաքում գրեթե ամենուր քանդած-փորածի հետքեր են, որոնք անընդհատ հիշեցնում են հայ-գերմանական վարկային ծրագրի եւ այդ ծրագրով արված ջրատարների փոխման մասին:Վերջերս էլ Վանաձորի ,,Լոռի,, հեռուստաալիքը ներկայացրեց Նարեկացի 47 հասցեի բնակիչների բողոքը ՝ իրենց թաղամասի փոսերի վերաբերյալ. ջրատարները փոխել են, ու ասֆալտապատում չեն արել:Մի առիթով էլ ,,Միգ,, հեռուստաալիքը համանման բողոք ներկայացրեց ՝ մեկ այլ թաղամասից: Եթե քաղաքի այլ թաղամասերում էլ բնակիչներն իրենց համայնքային խնդիրների նկատմամբ հետեւողականություն ցուցաբերեին եւ բարձրաձայնեին այդ խնդիրները, ապա նման խնդիրներն ավելի քիչ կլինեին: Հավելենք նաեւ, որ մայթերն առհասարակ չեն ասֆալտապատվում, այլ միայն ՝ ավտոճանապարհահատվածները: Լավագույն դեպքում, եթե որեւէ գործարար օբյեկտ է կառուցում, իր օբյեկտի մայթն ասֆալտապատում է : Իսկ համայնքի ավագանուն կարծես ամենեւին չեն հուզում այս կարգի ,,մանր-մունր,, հարցերը...: Մի քանի ամիս հետո, հոկտեմբերին, ,,Վանաձորի օր,, տոնակատարությունն է:Տեղին կլիներ, եթե մինչ այդ հայտարարվեր տոնին նվիրված երգի ու լոգոյի մրցույթ ՝ ,,Խճապատված ու քարուքանդ իմ Վանաձոր,, թեմայով: ԳԱՅԱՆԵ ՀՈՎՍԵՓՅԱՆ
Подписаться на:
Сообщения (Atom)