Հայ հեռուստադիտողն ազատվեց իր ,,Հարազատ թշնամուց,,

Բազմասերիալի վերջին սերիան ընթանում էր այլ հաղորդումների ժամերի հաշվին, լեզվի օրենքի խախտումով

Մարտի 27-ը կարելի է ամրագրել հայ տոմարացույցում ՝ որպես ,,Հարազատ թշնամին,, սերիալի կամավոր ու պարտադրված դիտումներից ազատագրվելու տոն.պարտադրված , քանի որ տարբեր հաղորդումների ընդմիջումներին մեկ էլ հանկարծ սերիալի ՝ տվյալ օրվա անոնսն էր ցուցադրվում ՝ հերոսների հիստերիկ ճչոցներով ու բիրտ կեցվածքով, սրտաճմլիկ ու դաժան  տեսարաններով:2014թվին, երբ տեսա, որ 2 տարի անընդհատ ցուցադրվող սերիալի վերջն այդպես էլ չի ուրվագծվում,պարբերաբար մի քանի հոդվածներ գրեցի սույն բլոգում եւ ֆեյսբուքի իմ էջում:Զուգահեռաբար էլ հետեւում էի ֆիլմի առթիվ համացանցային մեկնաբանություններին, տարբեր մարդկանց կարծիքներն էի ուսումնասիրում:,,Էդ կինոն արդեն էլ չենք նայում, ,,Շանթով,, սերիալ է գնում, դա ենք նայում,,  ,,Երբ ա՞ էդ կինոն պրծնելու, էլ չի նայվում, մեկումեջ ենք նայում,, ՝այս կարգի կածիքներ կային:Համացանցում էլ մարդիկ աղաչում-պաղատում էին, որ սերիալը եզրափակեն, քանի որ արդեն ձանձրացել ու հոգնել են նույն տեսարանների անվերջ կրկնությունից՝հերոսների հիշողությունների տեսքով, նաեւ տհաճություն են զգում ժարգոնային բառապաշարից ու առհասարակ հակադաստիարակչական ու հակաէսթետիկական տեսարաններից, բռնությունից, դաժանությունից, հերոսների պահվածքից ու այն հանգամանքից, որ սերիալում գրեթե ոչ մի հերոս դրական չէ: Ի հեճուկս սերիալը ,,չուզողների,, էլ ՝ սցենարիստը ֆեյսբուքում հատուկ էջ էր բացել ու ըստ կադրերի ՝,,լայքեր,, էր հավաքում / իսկ Հայաստանում ոնց ընտրություններն են, այնպես էլ ՝ լայքերը,, /: 2 տարվա ընթացքում սերիալի դերասաններից ոմանք գնացին ուրիշ սերիալներ, նրանց սերիալներն այնտեղ ավարտվեցին, բայց ՝ ,,Հարազատ թշնամին,, դեռ գնում ու գնում էր ՝սադոմազոխիստական տեսարաններով ու հոգեվերլուծություններով, նույն տեսարանը մի քանի անգամ նույն կադրում կրկնելով, դաժանության ցուցադրումով...Վերջապես եկավ սերիալի ավարտի բաղձալի օրը եւ խոստացված ,,անակնկալը,,. ոխերիմ խնամիներ Կարպիչին ու Բալայան Յուրիկին սցենարիստն ,,սպանեց,,. մեկն ինքնասպան եղավ՝ իր վրա կրակելով, մյուսն էլ նրա քայլին հետեւեց ՝ կամավոր ավտովթարի ենթարկվելով, ու Աստծուն դեմ գնալով ինքն իրեն արդարացրեց, թե իրենց մահը երջանկություն կբերի: Մարդիկ մինչեւ հիմա չեն հասկանում, թե ինչու՞ այդքան դաժան վարվեց սցենարիստը ՝գլխավոր կերպարների հետ / թեպետ ՝այդ կերպարները երկուսն էլ մեղքերի մեջ թաղված էին /: Ուզում էիք սպանե՞լ, է, երբ որ Բալայան Յուրիկը հարձակվել էր խնամու վրա ու խեղդամահ էր անում, էն ժամանակ ,,սպանեիք,, կամ ՝ երբ որ բանտում հարձակվեցին Կարպիչի վրա ու էլի փորձեցին խեղդամահ անել, էլ ինչու՞ մի հատ էլ հերթական անգամ հիվանդանոցի դուռը հասցրիք, հետո էլ հաշմանդամի անվասայլակին գամեցիք՝նոր ,,ինքնասպան,, դարձրիք: Սցենարիստը ոչ միայն կերպարների հետ դաժան վարվեց, այլեւ ՝ հեռուստադիտողի: Սերիալը շատ ավելի երկար տեւեց, քան ՝ սովորաբար, քանի որ մեկ շաբաթվա չափաբաժինն ամբողջացվել էր 1 ,,փաթեթում,, ու հեռուստադիտողն էլ չէր զգուշացվել, որ այդ առթիվ փոխվել են սերիալին հաջորդող հաղորդումների ժամերը.մարդիկ նստած սպասում են, թե ինչով է ավարտվելու ,,Էմիգրանտներ,, բազմասերիալը, որի վերջին սերիան էլ էր այդ օրը նախատեսված, ու հատուկ հայտարարվել էր, բայց՝ այդ օրը դեդեկտիվ ժանրի,,Էմիգրանտների,, փոխարեն հեռուստադիտողներին այդ ժամին ,,Տնփեսա,, երգիծական սերիալի միմոսությունները ներկայացրին ու ամերիկյան ինչ-որ ,,փախած,, ֆիլմ, իսկ ,,Էմիգրանտները,, փոխադրվեց կիրակի: ,,Էմիգրանտներին,, նախորդող ,,Բախտաբերի,, ժամն էլ ,,կերան,, ՝ շատ ուշ ժամի ցուցադրելով:Որ ի՞նչ, որ մարդիկ ստիպված իրենց չնախընտրած սերիալներն էլ նայե՞ն, գովազդներն էլ ՝,,մսխեն,, ու սպասեն, թե երբ է ,,Հարազատ թշնամին,, ավարտվելու, որ իրենց նախընտրած հաղորդումը դիտե՞ն: ,,Այլընտրանքը,, փորձում ես գտնել Հ1-ում ՝մինչեւ սերիալն ավարտվի, բայց այնտեղ էլ բացահայտ ,,գովք անառակության,, ֆիլմ է գնում. դրանք էլ արտասահմանյան աղբի վրա են մասնագիտացել, ու ինչքան աղբ կա ՝ բերում լցնում են պետբյուջեից սնվող ալիք, որ ազգս կատարելագործվի անասնական բնազդների ու բարոյական նկարագրի մեջ...Ամենայն հավանականությամբ, տարբեր հաղորդումների ժամերի տեղափոխությունը նպատակ է հետապնդում դժգոհությունների ալիքի միջոցով պարզել տվյալ ալիքի դիտողականության աստիճանը. եթե դժգոհում են ՝ուրեմն նայում են, ուրեմն այդ ալիքը դիտողական է ու ,,վարկանիշային,,:

...Ի դեպ,   ,,Հարազատ թշնամու,, վերջին սերիայում էլ խախտեցին լեզվի օրենքը ՝ ֆիլմում հնչող ռուսերենը չթարգմանելով: Չգիտես ինչու ՝ազգությամբ հայ կերպարին որոշել էին հաճախակի ռուսերեն ,,խոսեցնել,, ու չթարգմանել:Այդ նույն երեւույթը կար նաեւ ,,Էմիգրանտներ,, սերիալում, երբ կերպարը ռուսերեն էր խոսում, ու նրա տեքստը չէր թարգմանվում հայերեն: Ինչու՞ անգլերեն տեքստը պետք է թարգմանվի, ռուսերենը ՝ոչ:

ԳԱՅԱՆԵ ՀՈՎՍԵՓՅԱՆ